TEPA DEDU

Cerita dalam bahasa Daerah

Tepa Dedu

  

Ha   nembu, datu ine ne’e ame ne’e ana imu ko’o ta  mbu’e ha ngga’e ta modhe raka re’e. Ngara ana mbu’e imu ko’o  ke, Tepa Dedu. Ena nunangi, ata sodho imu ko’o ke sa’o tenda ta do’e - do’e. Ha ndeka imu ko’o muri mbepu moa re’e. Uwi kaju komba ne’e hase lae ta pesa negha mbeja ena keka uma imu ko’o. Ta lesi tungga muku ha doka uru ko’o dera mere ta demba.

            Ha kombe, ame ko’o Tepa Dedu nipi kombe papa luka ne’e Lo’a mosa ha eko. Lo’a mosa ke sodho ne’e imu : “ ja’o negha tei ka ko’o odo susa ena sa’o tenda kau. Nambu te ta pale pawe tungga kau ke’a uma baru. Negha ke kau weda ana kau Tepa Dedu ta kau pale mesu. Kau nggete imu go’o - go’o negha ke pora imu kau wesa ena uma ta kau de ke’a. La imu napa jadi ae ta tau keta fa tana uma kau”

            To’o odo poa, ata bapa ke to’o nande. Imu niu mbeja ha sa’o negha ke imu punu mbeja ko’o odo nipi imu. Da’e mbeja imu seru, Tepa Dedu dhewo : “bapa, jao fonga tau sena ate miu. Ede ja’o mata todo imu”.

Negha ke ne’e ula mo ate susa, imu ko’o ha ngai rende mo’o dheko odo welo one nipi nde. Ne’e dima ta pofi refa, ata bapa ke wiki topo imu. Imu dhadi topo imu de’e - de’e pero watu ena nia sa’o imu ko’o negha ke imu niu ana imu mo’o laka dhodho pu’u ena one sa’o. Niu do’e, Tepa Dedu dhewo : “ reke ha go’o, bapa. Ja’o dhatu rio dao, kake lubhi ne’e peda pakia lema”. Ata bapa ke reke, bhodo mona mbai ebho imu niu wado. Tepa Dedu dhewo : “reke ha go’o, bapa. Ja’o piru ka lema ine”. Negha ke dhu ena wiwi tedu, Tepa Dedu dhodho pu’u rade one sa’o. Imu dhato ame imu negha ke imu sodho : “ bapa, rore si ja’o.”

            Ne’e ate susa, ae du nali, ata bapa ke awe topo weda ana imu. Imu ndota ana imu go’o - go’o. Negha ke weki ta negha mbebhu mbenu la imu wesa ena uma ta imu de ke’a.

O’i ke, ata bapa ke wado nuka ena sa’o imu. Imu ne’e fai imu reke ha dera-dera rua jeka dera ta modo mo’o ono wado uma lema ta de ke’a nde. Weke minggu rua, imu ko’o dado wado uma imu ko’o ke. Imu ko’o tei kulu mbene ta me’a pu’u ena kulu mbene ta pesa. Ate imu ko’o kedi ngara kulu mbene ke ta muri pu’u ena weki-la ana imu ko’o.

Dera nge-nge, kulu  mbene ke mere nge-nge. Kulu mbene ke ta napa ata ti’i ngara Jawa. Woso ta sodho ngara fu ena jawa ke fu ko’o Tepa dedu ne’e esa jawa ke ko’o po’i-po’i ate ko’o Tepa Dedu ta milo ne’e pawe.

One nunangi, o’i ke ata sodho odo muri ko’o sa’o tenda ke negha mona mbepu moa. Imu ko’o muri sena, papa mesu ne’e mbi nge mesa kapa.